पुण्यात पोलिस आणि गुन्हेगार यांच्यात सिनेस्टाईल थरार निर्माण झाला असून आरोपींनी थेट पोलिसांच्या दिशेने गोळीबार करत पळ काढल्याची धक्कादायक घटना समोर आली आहे. या घटनेमुळे संपूर्ण परिसरात काही काळ तणाव आणि भीतीचे वातावरण निर्माण झाले होते. पोलिसांना मिळालेल्या माहितीच्या आधारे आरोपींच्या शोधासाठी सापळा रचण्यात आला होता. आरोपी रांजणगाव परिसरातील पिंपरी दुमाला गावात असल्याची माहिती मिळाल्यानंतर पोलिसांचे पथक घटनास्थळी दाखल झाले. मात्र पोलिसांना पाहताच आरोपींनी दुचाकीवरून पळ काढण्याचा प्रयत्न केला. पोलिसांनी तात्काळ पाठलाग सुरू केला आणि काही अंतरावर पोलिसांच्या वाहनाची धडक आरोपीच्या दुचाकीला बसली. या धडकेनंतर आरोपीने दुचाकी सोडून पळ काढला. त्याचवेळी आरोपींनी पोलिसांच्या दिशेने हवेत गोळीबार केल्याची माहिती समोर आली आहे. परिस्थिती गंभीर होताच पोलिसांनीही स्वसंरक्षणासाठी हवेत गोळीबार केल्याचे सांगण्यात येत आहे. यानंतर आरोपी उसाच्या शेतात घुसून फरार झाले. पोलिसांनी शेतात शोधमोहीम राबवली, मात्र दाट उसाचे पीक आणि अंधाराचा फायदा घेत आरोपी पळून जाण्यात यशस्वी झाले. या घटनेनंतर परिसरात मोठ्या प्रमाणावर पोलिस बंदोबस्त वाढवण्यात आला असून नाकाबंदी सुरू करण्यात आली आहे. फरार आरोपींपैकी एकाचे नाव शेखर संभाजी जाधव असल्याचे समोर आले असून त्याच्यावर यापूर्वीही गंभीर गुन्हे दाखल असल्याची माहिती आहे. पुणे ग्रामीण पोलिस आणि पिंपरी-चिंचवड पोलिसांचे संयुक्त पथक आरोपींच्या शोधासाठी रवाना करण्यात आले आहे. या घटनेमुळे परिसरातील नागरिकांमध्ये भीतीचे वातावरण निर्माण झाले असून पोलिसांकडून आरोपींचा कसून शोध सुरू आहे.