राज्याच्या वित्त आणि नियोजन विभागावरून महायुतीच्या राजकारणात पुन्हा हालचाली सुरू झाल्या आहेत. हा विभाग राष्ट्रवादी काँग्रेसकडे पुन्हा यावा, या मागणीसाठी उपमुख्यमंत्री आणि राष्ट्रवादी काँग्रेसच्या राष्ट्रीय अध्यक्षा सुनेत्रावहिनी पवार केंद्रीय गृहमंत्री अमित शाह यांची भेट घेणार असल्याची माहिती आहे. अमित शाह यांच्या आगामी मुंबई दौऱ्याच्या पार्श्वभूमीवर ही भेट महत्त्वाची मानली जात आहे.
राष्ट्रवादी काँग्रेसच्या गाभा समितीच्या बैठकीत वित्त आणि नियोजन विभाग पुन्हा पक्षाकडे मिळावा, यासाठी वरिष्ठ नेत्यांच्या शिष्टमंडळाने अमित शाह यांची भेट घ्यावी, असा निर्णय घेण्यात आला. सुनेत्रावहिनी पवार यांच्या नेतृत्वाखाली पक्षाने ही भूमिका पुढे नेण्याचे निश्चित केले आहे.
अमित शाह १३ आणि १४ सप्टेंबर रोजी मुंबई दौऱ्यावर येणार आहेत. या दौऱ्यात त्यांच्या विविध कार्यक्रमांचे नियोजन असून, याच काळात राष्ट्रवादीच्या शिष्टमंडळाची त्यांच्याशी भेट होण्याची शक्यता व्यक्त केली जात आहे. त्यामुळे मुंबईतील या संभाव्य भेटीकडे आता राजकीय वर्तुळाचे लक्ष लागले आहे.
महायुती सरकारच्या खातेवाटपात वित्त आणि नियोजन विभाग राष्ट्रवादी काँग्रेसच्या वाट्याला आला होता आणि तत्कालीन उपमुख्यमंत्री अजित पवार यांच्याकडे या विभागाची जबाबदारी होती. त्यांच्या निधनानंतर राज्याच्या अर्थसंकल्पीय कामकाजात अडथळा येऊ नये म्हणून हा विभाग मुख्यमंत्री देवेंद्र फडणवीस यांच्याकडे तात्पुरता देण्यात आला. मात्र, त्यानंतरही विभाग राष्ट्रवादीकडे परत आलेला नसल्याने पक्षाकडून पुन्हा ही मागणी पुढे करण्यात आली आहे.
वित्त विभाग हा राज्याच्या विकासकामांसाठी निधी नियोजन आणि वितरणाच्या दृष्टीने अत्यंत महत्त्वाचा मानला जातो. त्यामुळे हा विभाग राष्ट्रवादी काँग्रेसकडे परत मिळावा, अशी पक्षाची भूमिका आहे. सुनेत्रावहिनी पवार स्वतः अमित शाह यांच्यासमोर पक्षाची ही भूमिका मांडणार असल्याने आगामी चर्चेकडे विशेष लक्ष आहे.
दरम्यान, राष्ट्रवादी काँग्रेसकडून आगामी निवडणुकांच्या पार्श्वभूमीवर संघटनात्मक तयारीलाही वेग देण्यात येत आहे. बूथ पातळीपासून संघटन मजबूत करणे, मतदार नोंदणीवर भर देणे आणि नव्या कार्यकर्त्यांना संघटनेत संधी देण्याबाबतही गाभा समितीच्या बैठकीत चर्चा झाली. २७ सप्टेंबर रोजी नाशिक येथे पक्षाचे शिबिर आयोजित करण्याबाबतही नियोजन करण्यात आले आहे.
आता १३-१४ सप्टेंबरच्या मुंबई दौऱ्यात अमित शाह आणि सुनेत्रावहिनी पवार यांची संभाव्य भेट होते का आणि वित्त व नियोजन विभागाबाबत काय निर्णय होतो, याकडे महाराष्ट्राच्या राजकीय वर्तुळाचे लक्ष लागले आहे.
