ठाणे भागातील वागळे इस्टेटमधील किसन नगर ४, रोड २८ येथील युवक काँग्रेस कार्यालयाची ओळख बदलण्याचा प्रकार समोर आल्याने खळबळ उडाली आहे. बनावट कागदपत्रांच्या आधारे या अधिकृत कार्यालयाचे नाव शिवसेना जनसंपर्क कार्यालय असे करण्यात आल्याचा दावा काँग्रेस पक्षाने केला आहे. मालमत्ता क्रमांक ८०२२६३४ अशी नोंद असलेल्या या जागेचा नियमित करही काँग्रेसकडून भरला जात असून, या धक्कादायक प्रकारामुळे राजकीय वातावरण तापले आहे.
अखिल भारतीय युवक काँग्रेसचे राष्ट्रीय अध्यक्ष उदय भानू चीब यांच्या नावाने कथित बनावट संमतीपत्र आणि खोट्या स्वाक्षरीचा वापर करून हे नाव बदलण्यात आल्याचा आरोप आहे. या प्रकरणी काँग्रेसने १० सप्टेंबर रोजी महापालिका प्रशासनाकडे पुराव्यांसह तक्रार दाखल केली होती. मात्र ५० दिवसांहून अधिक काळ उलटूनही कोणतीही ठोस कारवाई झाली नाही, त्यामुळे ठाणे शहर जिल्हा काँग्रेस कमिटीचे अध्यक्ष राहुल कारभारी पिंगळे यांच्या नेतृत्वाखाली शिष्टमंडळाने महापालिका आयुक्त सौरभ राव यांची भेट घेतली.
या भेटीदरम्यान नेत्यांनी आयुक्तांसमोर सर्व पुरावे सादर केले आणि मूळ पत्र दाखवले, त्यानंतर आयुक्तांनी या प्रकरणात गुन्हा दाखल करण्याचे आदेश दिले. या वेळी मोहन तिवारी, सन्नी थॉमस, सुरेश पाटीलखेडे, दयानंद एगडे, शिरीष घरत, स्मिता वैती, संगीता कोटल, हर्षल कोळी, अजिंक्य भोईर, पप्पू आठवाल, स्वप्निल कोळी यांसह अनेक नेते उपस्थित होते.
केवळ गुन्हा दाखल करून चालणार नाही तर बनावट कागदपत्रांच्या आधारे नोंद बदलण्यास जबाबदार असलेल्या अधिकाऱ्यांवर निलंबनाची कारवाई करावी, अशी मागणी राहुल पिंगळे यांनी केली आहे. प्रशासनाने ७ दिवसांत योग्य पद्धतीची कारवाई न केल्यास महापालिका आयुक्तांच्या दालनाबाहेर तीव्र आंदोलन छेडण्यात येईल आणि उच्च न्यायालयात याचिका दाखल केली जाईल, असा इशाराही देण्यात आला आहे.
