मुंबई महानगरात अमली पदार्थांच्या तस्करीचे जाळे पसरवण्यासाठी तस्करांकडून नवीन आणि चिंतेत टाकणारी पद्धत वापरली जात असल्याचे उघड झाले आहे. गरिबी, घरातील आजारपण आणि पैशांची चणचण यांचा गैरफायदा घेत लहान मुलांना ड्रग्जच्या अवैध व्यवसायात ओढले जात असल्याची माहिती समोर आली आहे. बोरिवली आणि दहिसर भागात हेरॉईनच्या विक्रीसाठी अल्पवयीन मुलांना वाहक म्हणून वापरले जात होते.
तस्करांकडून मुलांना हेरॉईनच्या १०० छोट्या पुड्यांची विक्री करून दिल्यास १ हजार रुपये दिले जात असल्याचे तपासात पुढे आले आहे. बोरिवलीतील दौलतनगर, संजय गांधी राष्ट्रीय उद्यानालगतच्या झोपडपट्ट्या आणि दहिसर पूर्वेकडील काही भागांत ही मुले सक्रिय असल्याचे आढळले. लहान मुलांवर पोलिसांची नजर कमी असते आणि त्यांच्या हालचालींवर कोणाचा संशय जात नाही, याच गोष्टीचा फायदा हे तस्कर घेत होते.
या गंभीर प्रकरणाची दखल घेत कस्तुरबा मार्ग पोलिसांनी एका ६० वर्षांच्या महिलेसह तिच्या सुनेला अटक केली आहे. रेहाना अब्दुल हमीद मुलानी आणि फरीदा मुलानी अशी या महिलांची नावे असून, रेहाना ही या संपूर्ण नेटवर्कची मुख्य सूत्रधार असल्याचा संशय पोलिसांना आहे. रेहाना हिच्याविरुद्ध याआधी विविध ठाण्यांत १७ गुन्हे नोंदवले गेले असून, त्यातील ४ गुन्हे अमली पदार्थ विक्रीशी संबंधित आहेत आणि ती २००८ पासून या अवैध धंद्यात सक्रिय असल्याचा पोलिसांचा दावा आहे.
या घटनेमुळे पालकांमध्ये आणि स्थानिकांमध्ये चिंतेचे वातावरण निर्माण झाले असून, पोलिस आता या रॅकेटमधील इतर साथीदारांचा कसून शोध घेत आहेत. रेहाना हिचे दोन मुलगे आणि एका नातवाच्या भूमिकेची सुद्धा कसून चौकशी सुरू आहे. अमली पदार्थांच्या या जाळ्यातून मुलांना बाहेर काढण्यासाठी आणि तस्करांचे हे नेटवर्क पूर्णपणे मोडीá काढण्यासाठी पोलीस यंत्रणा अधिक कठोर पावले उचलत आहे.
