कल्याण आणि डोंबिवली परिसरात दिवाळीचा आनंद साजरा करताना थोडीशी बेपर्वा पद्धत किती महागात पडू शकते, याचा अनुभव येथील रहिवाशांना आला आहे. लक्ष्मीपूजनाच्या दिवशी ८ नोव्हेंबर रोजी संध्याकाळी ७ ते रात २ या अवघ्या सात तासांत शहरात आगीच्या घटनांचा मोठा भडका उडाला. अग्निशमन दलाने दिलेल्या माहितीनुसार या कालावधीत तब्बल ७० आगीच्या घटनांची नोंद झाली असून त्यातील ६८ आगी फटाक्यांमुळे लागल्याचे स्पष्ट झाले आहे.
या भीषण सत्रामध्ये कुठे गृहसंकुलाच्या गॅलरीला आग लागली तर कुठे निर्माणाधीन इमारतीचे साहित्य जळून खाक झाले. काही ठिकाणी झाडे आणि वाहनांना देखील आगीची झळ बसल्याचे समोर आले आहे. डोंबिवली पूर्वेकडील एका संकुलाच्या सहाव्या मजल्यावर गॅलरीत फटाक्यांमुळे आग लागली. तसेच कल्याण पूर्वेत निर्माणाधीन इमारतीला लागलेली आग विझवण्यासाठी जवानांना दोन ते तीन तास मेहनत घ्यावी लागली. कल्याण पश्चिमेत सर्वाधिक १९ आगींची नोंद झाली असून कल्याण पूर्वेत १२, डोंबिवली पूर्व भागात १५ आणि डोंबिवली पश्चिमेत ११ आगी लागल्या.
रॉकेटसारखे फटाके उडवल्यामुळे कचऱ्याचे ढीग आणि गॅलरीतील साहित्याने पेट घेतल्याचे अग्निशमन दलाने सांगितले. काही ठिकाणी स्थानिकांनी मदत मागण्याचा प्रयत्न केला पण फोन उचलला गेला नाही अशा तक्रारी सुद्धा समोर आल्या आहेत. असे असले तरी जवानांनी वेळेत घटनास्थळी धाव घेऊन परिस्थिती नियंत्रणात आणली त्यामुळे कोणत्याही प्रकारची जीवितहानी किंवा दुखापत झाली नाही.
या सर्व घटनेनंतर मुख्य अग्निशमन दल अधिकारी नामदेव चौधरी यांनी नागरिकांना महत्त्वाचे आवाहन केले आहे. फटाके फोडताना मोकळ्या मैदाना चा वापर करावा आणि रॉकेट उडवणे टाळावे असे त्यांनी म्हटले आहे. सण साजरा करताना कोणाच्याही मालमत्तेचे किंवा पर्यावरणाचे नुकसान होणार नाही याची काळजी घेणे आता गरजेचे बनले आहे.
